टोकियो: जापानभर सोमबार २० वर्ष पूरा गरेका युवायुवतीले ‘कमिङ अफ एज डे’ (सेइजिन नो हि) मनाएका छन् । यस अवसरमा युवतीहरू लामो बाहुला भएका रङ्गीचङ्गी किमोनो (फुरिसोडे) र युवाहरू औपचारिक सुट वा परम्परागत हाकामा र हाओरी पोशाकमा सजिएर समारोहमा सहभागी भएका थिए ।
यद्यपि जापानमा सन् २०२२ अप्रिलदेखि कानुनी रूपमा वयस्क उमेर १८ वर्ष तोकिएको छ, अधिकांश स्थानीय सरकारले भने परम्परागत रूपमा २० वर्ष पुगेकाहरूका लागि कमिङ अफ एज डे समारोह आयोजना गर्दै आएका छन् । यो समारोह जापानमा वयस्क जीवनमा प्रवेशको महत्त्वपूर्ण सामाजिक संस्कारका रूपमा व्यापक रूपमा मनाइन्छ ।
योकोहामाको योकोहामा एरिनामा दुई चरणमा आयोजना भएको कार्यक्रममा प्रत्येक समारोह एक घण्टाभन्दा कम समय चलेको थियो । समारोहअघि र पछि युवायुवतीहरू एरिनाको प्रवेशद्वार, फुटपाथ र नजिकका रेल स्टेसन वरिपरि भेला भएर लामो समयपछि भेटिएका साथीहरूसँग खुशीयाली साटासाट गरिरहेका देखिन्थे ।
समारोहमा सहभागीहरूले राष्ट्रिय गानका लागि उभिएर सम्मान प्रकट गरेका थिए । त्यसपछि उनीहरूले योकोहामा सहरको गीत सामूहिक रूपमा गाए । धेरैले मोबाइल फोनको बत्ती बालेर हललाई उज्यालो बनाएका थिए।
